2004 – Magnús Eiríksson

Magnús Eiríksson var fyrsti heiðursfélagi Blúsfélags Reykjavíkur 2004. Hann er nánast óþarft að kynna en Blúskompaní hans hefur starfað síðan blússagan hófst á Íslandi og blúsinn aldrei langt undan í lögum hans.

2005 – Björgvin Gíslason

Sigurgeir Sigmundsson gítarleikari afhenti honum viðurkenninguna og sagði meðal annars ” Oftast var ég að fara til þess að hlusta á goðið mitt sem brosti breitt með Gibson SG framan á vömbinni. Maður sogaði í sig hverja nótu af áfergju því aldrei klikkaði gítaristinn sem í mínum huga stóð samhliða þeim bestu erlendis. Sú skoðun mín hefur ekki breyst.Það var greinilegt hvert hann sótti efniviðinn í sólóin sem voru ættuð beint frá blúsnum enda sóttust þekktir blúsarar eins og Gatemouth Brown eftir nærveru hans seinna. Árum saman hefur einlægur blússpuni hans fengið hárin til þess að rísa á áheyrendum þegar hann hefur tekið þátt í blúskvöldum og blúshátíðum. Hver nóta kemur frá hjartanu og sama gildir um skoðanir hans á tilverunni. Hann gerir alltaf það sem hjartað býður honum þó svo að vitað sé að hann hagnist síður á því fjárhagslega eða á annan hátt. Hann er því blúsari af lífi og sál og gerir allt af tilfinningu og nákvæmni “
2006 – Andrea Gylfadóttir

Árið 2006 veitti Blúsfélag Reykjavíkur Andreu Gylfadóttir viðurkenningu og gerði að heiðursfélaga fyrir framlag sitt til blústónlistar á Íslandi. Andrea Jónsdóttir útvarpskona afhenti verðlaunin.

2007 – Kristján Kristjánsson

2007 – Kristján Kristjánsson. Blúsfélag Reykjavíkur sæmdi í dag tónlistarmanninn KK, Kristján Kristjánsson Blúsmann ársins, við setningu Blúshátíðar í Reykjavík 2007 á Nordica Hotel, en Blúsfélgaið er systurfélag Blúshátíðarinnar.KK hefur árum saman verið í fararbroddi í blústónlist á Íslandi, og sló í gegn með tónlist sinni í uppfærslu Leikfélags Reykjavíkur á Þrúgum reiðinnar eftir John Steinbeck á sínum tíma.  KK hefur gefið út fjölmargar plötur með tónlist sinni og annarra á liðnum árum og átt í farsælu samstarfi við aðra listamenn, einkum Magnús Eiríksson, og systur sína Ellen Kristjánsdóttur. Fyrir tveim árum lék KK á Blúshátíð í Reykjavík með Svíþjóðarbandi sínu, The Grinders við mikinn fögnuð. Á síðasta ári gaf hann út plötuna Blús, sem hlaut einróma lof gagnrýnenda.  KK kemur fram á Blúshátíð í ár.Blúshátíð í Reykjavík er nú haldin í fjórða sinn, en þeir sem áður hafa hlotið þessa heiðursnafnbót eru Magnús Eiríksson (2004), Björgvin Gíslason (2005) og Andrea Gylfadóttir (2006).

2008 – Ásgeir Óskarsson  

Ásgeir Óskarsson trommuleikari hefur verið valinn heiðursfélagi Blúsfélags Reykjavíkur í ár.  Þetta var tilkynnt við opnun Blúshátíðar í Reykjavík á Hilton Reykjavík Nordica.  Með viðurkenningunni frá Blúsfélaginu fylgdi forláta Gretch trommusett af bestu gerð í þakklætisvott fyrir framlag til blústónlistarinnar.  Ásgeir er einn virtasti trommari á Íslandi og hefur hann spilað með flestum stærstu hljómsveitum og tónlistarmönnum Íslands.

2009 – Pinetop Perkins

Pinetop Perkins er íslenskum blúsunnendum að góðu kunnur, hann spilaði um tíma með íslenskum blúsmönnum, Blue Ice Band (Vinir Dóra), í Chicago fyrir miðjan tíunda áratuginn, og spilaði einnig með þeim hér á landi. Hann hefur sjálfur sagt plötuna sem hann gaf út með Blue Ice Band  Vinum Dóra, sína bestu. Sú plata er mikið fágæti platan hefur lengi verið uppseld og ófáanleg. Það má því segja að Pinetop Perkins sé guðfaðir blústónlistarinnar á Íslandi.

2010 – Deitra Farr

Deitra Farr hefur hlotið fjölda verðlauna og komið fram á blúshátíðum um allan heim. Hún kom hingað til lands árið 1992 og  fór í tónleikaferð með Vinum Dóra og hljóðritaði með þeim lög á diskinn ” Mér líður vel” . Þá var hún ung og efnileg en nú er hún orðin ein af bestu blússöngkonum heims.  Nánari upplýsingar um Deitru má finna á   www.deitrafarr.com .

2011 – Guðmundur Pétursson 

Guðmundur Pétursson var valinn heiðursfélagi Blúsfélags Reykjavíkur árið 2011. Guðmundur Pétursson er listamaður sem vart þarf að kynna, því árum saman hefur hann verið í metum sem einn besti gítarleikari landsins. 2008 sendi hann frá sér plötuna Ologies. Honum til halds og trausts þar eru m.a. Matthías Hemstock trommu- og slagverksleikari, Hrafnkell Orri Egilsson sellóleikari og Styrmir Hauksson hljóðhönnuður. Guðmundur semur alla tónlist sem er undir margvíslegum áhrifum úr heimi rokk, jazz, blús, kvikmynda-, heimstónlistar og óhefðbundinnar tónlistar.

2012 Pétur Tyrfingsson

Heiðursfélagi Blúsfélags Reykjavíkur árið 2012 er Pétur Tyrfingsson. Útnefning heiðursfélagans var kynnt við setningarathöfn Blúshátíðar sem fram fór í Kolaportinu

Pétur Tyrfingsson er vel að heiðrinum kominn en fáir hafa verið jafn ötulir og hann við að kynna og stuðla að uppgangi blústónlistarinnar á Íslandi. Í sex ár hélt Pétur úti vikulegum útvarpsþáttum um blús og eftir hann liggur fjöldi blaðagreina um sögu blústónlistarinnar, tónlistarmenn og fleira sem viðkemur tónlistarstefnunni.

Tregasveitin, hin goðsagnakennda hljómsveit Péturs, var mjög áberandi í blúslífi landsmanna fyrr á árum. Þar vakti Guðmundur, sonur Péturs, fyrst athygli en Guðmundur Pétursson varð heiðursfélagi Blúsfélags Reykjavíkur á síðasta ári.

Það er mikill heiður fyrir Blúshátíð í Reykjavík að kynna endurkomu Tregasveitarinnar á Blúshátíð 2012 og það verður forvitnilegt að heyra þá feðga Pétur Tyrfingsson og Guðmund Pétursson spila saman eftir öll þessi ár.

2013 – Halldór Bragason

Halldór Bragason, sem er upphafsmaður Blúshátíðarinnar, hefur unnið ötullega að vexti og viðgangi tónlistarinnar á Íslandi í árartugi. Hann hefur komið að blúshátíðum víða um land, staðið fyrir námskeiðum og kennt fjölda manns að njóta og spila blús. Halldór hefur spilað og hljóðritað með mörgum virtustu blústónlistarmönnum samtímans, bæði á Blúshátíð í Reykjavík og erlendis, ýmist einn eða með hljómsveitunum sínum Vinum Dóra og The Blue Ice Band.

2014 Jón Ólafsson
2014 var Jón Ólafsson bassaleikari útnefndur heiðursfélagi Blúsfélags Reykjavíkur fyrir framlag sitt blústónlistarinnar á Íslandi.

Blústónlistinn hefur fylgt Jóni allan hans tónlistarferil. Hann vakti fyrst athygli sem bassaleikari Tatara, þá 16 ára gamall. Síðan hefur hann spilað með mörgum þekktustu og vinsælustu hljómsveitum landsins s.s. Pelican, Póker, Start og Vinum Dóra.

2015 Sigurður Sigurðsson

2015  var Sigurður Sigurðsson munnhörpuleikari og söngvari útnefndur heiðursfélagi Blúsfélags Reykjavíkur. Sigurður hefur verið  áberandi í íslenskri blústónlist áratugum saman, hann var söngvari og blés í munnhörpu með hljómsveitinni Kentár (Centaur) sem stofnuð var árið 1982. Kentár var öflug tónleikasveit sem kom með ferska strauma inn í blúslíf landsmanna. Sigurður er einnig meðlimur í Tregasveitinni, þeirri goðsagnakenndu blúshljómsveit sem hefur starfað frá 1988, og hefur spilað með fjöldi hljómsveita og tónlistarmanna, bæði á tónleikum og plötum. Þar má nefna plötur Woofer, Árna Johnsen, Ásgeirs Óskarssonar, Sálararinnar hans Jóns míns, Rikshaw, Mannakorna, Páls Óskars, Pláhnetunnar, Harðar Torfa, Stefáns Hilmarssonar, Stjórnarinnar, Jóhanns Helgasonar og Geirmundar Valtýssonar, auk margra annarra. Sigurður hefur sjálfur gefið út nokkrar sólóplötur.

2016 Lincoln T Beauchamp Jr. aka Chicago Beau

Banda­ríski tón­listamaður­inn og rit­höf­und­ur­inn Chicago Beau var út­nefnd­ur heiðurs­fé­lagi Blús­fé­lags Reykja­vík­ur við fjöl­menna setn­ingu Blús­hátíðar  2016 á Skóla­vörðustígn­um.

Chicago Beau var tíður gest­ur hér­lend­is á ár­un­um 1991 til 1995 og hafði veru­leg áhrif á ís­lenskt blús­líf. Hann kom á sterku menn­ing­ar­sam­bandi milli ís­lenskra og banda­rískra blús­tón­list­ar­manna og vann öt­ul­lega að út­breiðslu blús­tón­list­ar­inn­ar og kynn­ingu á ís­lensk­um blús­tón­list­ar­mönn­um er­lend­is. Um tíma ferðaðist hann hljóm­sveit­inni Vin­um Dóra og kom fram með hljóm­sveit­inni á fjölda tón­leika bæði í Evr­ópu og Banda­ríkj­un­um.

 

2017 Birgir Baldursson

Trommuleikarinn Birgir Baldursson var kjörin heiðursfélagi Blúsfélags Reykjavíkur við setningu Blúshátíðar 2017.

Blúshátíð 2017 var sett á Skólavörðustígnum þar sem tónlistarmenn buðu upp á sannkallaða Blúsveislu þar sem tónlistin ómaði. Boðið var upp á grillmat og félagar í Krúserklúbbnum viðruðu bíla sýna og höfðu þá til sýnis.

Birgir Baldursson, sem nú ber nafnbótina blúsmaður ársins, var heltekinn af trommuleik strax fjögurra ára gamall og og hefur slegið taktinn síðan. Fyrst urðu húsgögnin á heimili hans fyrir barðinu á honum, einnig lampar og ljós, en fljótlega fékk hann trommur og fór að spila með skólahljómsveit Kópavogs 10 ára gamall. Hann hefur spilað með hjómsveitum á borð við S.H. Draumum, Bless, Sálinni Hans Jóns míns, Mannakornum, Kombóinu, Blúsmönnum Andreu, Unun, Dr. Gunna, Blue Ice Band mörgum fleirum. Hann hefur leikið inná tugi hljómplatna, unnið við kvikmyndatónlist, í leikhúsum og við söngleiki, svo eitthvað sé nefnd. Birgir hefur verið einn af merkisberum blústónlistarinnar hérlendis undanfarin ár

2018 Tryggvi Hübner

Gítarleikarinn Tryggvi Hübner var útnefndur heiðursfélagið Blúsfélags Reykjavíkur við setningu Blúshátíðar í dag, laugardaginn 24. mars 2018..

Tryggvi hefur um árabil verið ein af burðarstoðunum í íslenskri blústónlist og leiðandi í íslensku tónlistarlífi bæði sem eftirsóttur gítarleikari og virtur gítarkennari.Með hljómsveita sem Tryggvi hefur
spilað með með má nefna Cabaret, Deildarbungubræður, EIK, Stofnþel og Súld. Tryggvi hefur komið við sögu á u.þ.b. 200 hljómplötum með fjölbreyttri tónlist. Þar má nefna, nefna plötur með Sinfóníuhljómsveit Íslands, Áhöfninni á Halastjörnunni, EIK, Mary Poppins og Súld, og plötur söngvara á borð við Bubba, Megas, Rúnar Júlíusson, Björgvin Halldórsson og Fabulu.Tryggvi hefur samið u.þ.b. 25 lög sem hafa verið gefin út á íslenskum hljómplötum og af sólóplötu hans Betri ferð sem kom út 1995 hafa tvö lög verið gefin út í 47 löndum af útgáfufyrirtækinu Parry/Promusic í USA.Tryggvi hóf nám í fiðluleik við Tónlistarskóla Kópavogs árið 1963, þá 6 ára en árið 1969 hóf hann nám í gítarleik og hefur ekki lagt það hljóðfæri frá sér síðan. Tryggvi stofnaði Gítarskóla Íslands ásamt Torfa Ólafssyni árið 1993

 

2019 Róbert Þórhallsson 

Bassaleikarinn Róbert Þórhallsson var útnefndur heiðursfélagi Blúsfélags Reykjavíkur við setningu Blúshátíðar í dag, laugardaginn 13. apríl.
Róbert er einn af okkar allra bestu og eftirsóttustu rafbassaleikurum. Hann hefur verið órjúfanlegur hluti íslenska blússamfélagsins um árabil og hefur meðal annars spilað með húsbandinu, Blue Ice Band, á hverri einustu Blúshátíð frá árinu 2006. Þar hefur hann spilað með öllum erlendu stórstjörnunum sem hafa komið fram á hátíðinni og stjórnað samspilinu af smekkvísi og fagmennsku.
Róbert Þórhallsson er sprenglærður tónlistarmaður. Hann byrjaði ungur að blása í trompet í tónlistarskóla Húsavíkur en skipti yfir í bassann 15 ára gamall. Hann brautskráðist frá Tónlistarskóla FÍH árið 1997. Haustið 1998 hóf Róbert nám í Conservatorium van Amsterdam þar lauk hann kennaranámi og marstesnámi í bassaleik. Hann brautskráðist þaðan vorið 2003 með láði, fyrstur nemanda í Jass- og hryndeild skólans.